Муус устар 17 күнүгэр Хаҥаластааҕы киин бибилэтиэкэҕэ 19 үйэтээҕи чөлүгэр түһэриллибит ытык малы – ийэ фотальбомун Ксенофонтовтар удьуор аймахтарыгар туттарар тэрээһин буолла.
Бу фотоальбом саха дьонун биир бастыҥ ыала, норуоттарыгар чулуу уолаттары бэлэхтээбит Ксенофонтовтар дьиэ кэргэн ийэлэрэ Екатерина Максимовна Ксенофонтова альбома буолар. Альбому сиэнэ Зоя Ивановна Ксенофонтова харыстаан, кэриэстээн илдьэ сылдьыбыта. Национальнай бибилэтиэкэ кинигэни харайар уонна чөлүгэр түһэрэр Киинин үлэһиттэрэ альбому чөлүгэр түһэрдилэр. Тэрээһиҥҥэ Национальнай бибилэтиэкэттэн кинигэни харайар уонна чөлүгэр түһэрэр киин сэбиэдиссэйэ Илья Оконешников, реставратор Мария Старостина, Медиакиин сэбиэдиссэйэ Аина Прибылых уонна режиссер Михаил Эверстов – Соргу кыттыыны ыллылар. Эҕэрдэ тылы СӨ Ил Түмэн Бэрэссэдээтэлин солбуйааччы А.С.Владимиров, саха народнай суруйааччыта П.Н.Харитонов – Ойуку, Хаҥалас улууһун мунньаҕын бэрэссэдээтэлэ А.П.Антонов, Тиит Арыы нэһилиэгин баһылыгын солбуйааччыта С.А.Кузьмина уо.д.а. тыл эттилэр. СР үтүөлээх артыыската Маргарита Борисова «Көмүөл” испэктээктэн Ийэ монологун ааҕан барыбытын олус долгутта, тэрээһиммитин киэргэттэ. Альбом Зоя Ивановна уолугар Александр Пуховка үөрүүлээх быһыыга-майгыга туттарылынна.
