Бүгүн Хаҥаластааҕы киин бибилэтиэкэҕэ умнуллубат, улахан күүтүүлээх долгутуулаах күн буолла. Дьону-сэргэни культура кэрэ эйгэтигэр угуйар киин бибилэтиэкэҕэ саха народнай суруйааччыта Павел Николаевич Харитонов – Ойуку аатын иҥэрии сиэрэ-туома үөрүүлээх быһыыга-майгыга ыытылынна. Бу туһунан улуус баһылыга С.Г.Гребнев 2026 сыл ыам ыйын 26 күнүнээҕи уурааҕа тахсыбыта.
Саха сирин, төрөөбүт улууһун устуоруйатыгар уһулуччу суолу-ииһи хаалларбыт, улахан үтүөлээх-өҥөлөөх үтүө дьон аатын иҥэрэр үгэстээхпит. П. Н.Харитонов – Ойуку – норуот суруйааччыта, П. А. Ойуунускай аатынан государственнай бириэмийэ лауреата, Россия Улахан литературнай бириэмийэтин лауреата, ССРС культуратын туйгуна, СӨ культуратын үтүөлээх үлэһитэ, Хаҥалас улууһун Бочуоттаах олохтооҕо. Ойуку олоҕо, общественнай үлэтэ, саха литературатын сайдарын иһин ураты талааннаахтык прозаҕа, позияҕа үлэтэ, биһиэхэ биир дойдулаахтарыгар киэн туттууну үөскэтэллэр, билиниибитин көрдөрөллөр уонна инники сайдыыбытын тускулууллар. Кини культура уонна искусство сайдыытыгар, историяны уонна кыраайы үөрэтиигэ дэгиттэр үтүө сабыдыалы оҥорбут киһи быһыытынан, тус кылаатын киллэрбит салайааччынан төрөөбүт улууһугар үрдүктүк сыаналанар. Үөрүүлээх тэрээһиҥҥэ улуус баһылыга Сергей Гребнев, улуус мунньаҕын депутаттарын Сэбиэтин бэрэссэдээтэлэ Анатолий Антонов, култуураҕа уонна духуобунай сайдыыга управлениетын салайааччыта Фекла Варламова, норуот суруйааччыта П.Н. Харитонов – Ойуку, кини дьиэ кэргэнэ, аймахтара кыттыыны ыллылар.
