Улуу Кыайыы 80 сылынан бүтүн Россия да, республикабыт да үрдүнэн элбэх тэрээһин ыытылынна. Хаҥаластааҕы киин бибилэтиэкэ уонна кини ситимигэр киирэр 23 библиотека филиаллара ааспыт сыл устата эр санааланыы уруоктарын, кылаас чаастарын, лекциялары ыыттылар. Ону таһынан “80 историй Победы”, “Улуу Кыайыы кэпсээннэрэ” диэн биир дойдулаахтарбытын, Аҕа дойду сэриитин кыттыылаахтарын сырдатар бырайыагы таһаарбыппыт. Бырайыак Улуу Кыайыыны уһансыбыт биир дойдулаахтарбытын билиһиннэрэр уонна үйэтитэр сыалтан оҥоһуллубута. Бырайыакка сэрии кыттыылаахтарын оҕолоро, сиэннэрэ, аймахтара кыттыһан, дьоннорун олохторун сэһэргээн “Улуу Кыайыы кэпсээннэрэ” тахсыбыта. Хомуллубут видеоматырыйааллар бибилэтиэкэ саайтыгар түмүлүннүлэр. Адьас соторутааҕыта бу бырыайыак “Сборник лучших проектов и практик” Национальнай бибилэтиэкэ бэчээттээн таһаарбыт хомуурунньугар киирбитэ.
Дьэ уонна бу Улуу Кыайыы 80 сылын түмүктүүр үлэнэн түөрт кинигэ таҕыста. Улуустааҕы оҕо бибилэтиэкэтэ “Өйдүүбүт, сүгүрүйэбит” диэн Хаҥалас улууһун үөрэнээччилэрин өйтөн суруйууларын хомуурунньугун кинигэтин бэлэмнээн таһаарда. Оскуола оҕолоро бэйэлэрин аймахтарын, эһэлэрин, эбэлэрин сэрии кэминээҕи олохторун үөрэтэн, суруйан киэҥ эйгэҕэ таһаардылар. Барыта 44 оҕо үлэтэ киирбит.
Чкалов олохтоох бибилэтикэрэ Степанова Раиса Семеновна уонна кыраайы үөрэтээччи Галина Ивановна Белых “Кинилэр Кыайыыны уһансыбыттара” диэн кинигэни хомуйан оҥорбуттара. Кинигэҕэ Хаҥалас улууһун III IV Малдьаҕар нэһилиэктэриттэн, Тиит Арыы сэлиэнньэтин Аҕа дойду Улуу сэриитигэр кыттыылаахтарын, тыылга Кыайыыны уһансыбыт холкуостаах хоодуоттар, сэрии сылларын оҕолорун ахтыылара киирбит.
Өктөм нэһилиэгин бибилэтиэкэрэ Данилова Сардана Егоровна “Октемский наслег во имя Победы” альбом-кинигэ хомуйан таһаарда.
Ону таһынан “Кыайыы суолунан” диэн Хаҥалас сириттэн Улуу Кыайыыга анаммыт уус-уран айымньылар хомуурунньуктара таҕыста. “Кыайыы суолунан” кинигэни хомуйан таһаарда. Кинигэҕэ фронтовик суруйааччылар Тимофей Сметанин, Исай Никифоров, фронтовиктар Конон Лирскэй, Василий Самойлов, Михаил Заболоцкай, народнай суруйааччы П.Харитонов – Ойуку, Өлүөнэ долгуннара айар литературнай түмсүү айымньылара киирбиттэр. Бу хомуурунньугу “Өлүөнэ долгуннара” түмсүү бэйэлэрэ үбүлээн таһаардылар. Дьокуускайга “Долун” кинигэ издательствотыгар бэчээттэнэн таҕыста. Кинигэ биһирэмэ Хаҥаластааҕы киин бибилэтиэкэҕэ Улуу Кыайыы күнүн көрсө буолла.
