Саха Өрөспүүбүлүкэтин үтүөлээх бырааһа Иван Семенович Трофимов төрөөбүтэ 80 сылыгар аналлаах “Үтүө киһи өйдөбүллээх, кэрэ киһи кэриэстэбиллээх” диэн ахтыы киэһэтэ киин бибилэтиэкэҕэ буолла. Сиһилии суруналыыс Людмила Аммосова ыстытыйатыгар ааҕыҥ.
«Эттим – Тоһоҕо!» диир үгэстээҕэ Иван Трофимов…
Иван Трофимов олохтон барбыта үйэ чиэппэриттэн ордук кэм аастар даҕаны сананылла, ахтылла сылдьара кини халтай бу сиргэ кэлбэтэҕин, олоххо бэйэтин суолун хаалларбытын бигэргэтэр.“Иван Семенович туппут балыыһаларыгар үлэлии, дьиэлэригэр-уотугар олоро сылдьабыт… Хайдах бу билиҥҥи курдук ханнык даҕаны граннарга, бырагыраамаларга киирсэр оччолорго, дойду тутула уларыйар, үп-харчы кырыымчык, ыһыллыы-тоҕуллуу сылларыгар кэскиллээҕи санаан, үрдүк сололоохтору кытары хайдах кэпсэтэн-ипсэтэн, тылын ылыннаран бу эбийиэктэри туттарбыта буолуой – “Биһик” оҕолонор дьиэни, дэриэбинэлэрбитигэр балыыһалары, медпууннары, эмчиттэрбитигэр икки этээстээх аҕыс кыбартыыралаах олорор таас дьиэни, “Ленские столбы” гостиницаны поликлиникаҕа ыһыгыннарбыта билиҥҥэ диэри абырыы олорор…”, “Үлэлиир каадыры олохсутууга улахан өҥөлөөҕө, үлэһиттэригэр болҕомтолооҕо, ол эрэн кытаанах ирдэбиллээҕэ…” “Булчута-алчыта, Байанайтан өрүү бэриһиннэриилээҕэ…”, “Буоксанан дьарыктанара. Чугас доҕотторун уһуйбута. Ытык спортсмеммыт аатынан сотору рөспүүбүлүкэтээҕитурнир салгыы ыытыллыа турар…”, “Аймаҕымсаҕын көрүө этигит, дьону сатаан түмэрэ, үчүгэй тэрийээччи этэ…” о.д.а. бу тэрээһиҥҥэ хотуттан-соҕурууттан кэлбиттэр эппиттэрэ-тыыммыттара, кырдьык, Иван Трофимов олорон ааспыт кылгас олоҕо мээнэ бэриллибэтэҕин туоһута буолар. Онтон бииргэ үлэлээбиттэр, алтыһан доҕордоһон ааспыт дьоно билигин да бааллара астыннарар.
Киһи ахтылларын тухары тыыннаах тыыннаах
Иван Семенович өссө оччолорго ыарыыны эрдэттэн «сэрэтиигэ» – профилактикаҕа болҕомтону уурбутун бэлиэтээн аһардылар. Киһи бэйэтин туругун бэйэтэ көрүнэ сылдьыахтааҕын, доруобуйатын харыстыахтааҕын туһунан этэрин тоһоҕолоон бэлиэтээн аһардылар. Кырдьык даҕаны, бэйэҥ көрүммэтэххинэ ким кыһаллыай – судаарыстыба онно усулуобуйа оҥордоҕуна да сөп курдук. Иван Семенович баара буоллар 80 сааһын туолуо этэ. Кини 1945 сыллаахха Улахан Аан сэлиэнньэтигэр төрөөбүтэ, сис аймах Трофимовтар биир түс-бас киһилэрэ этэ. Уопсайынан, бу сыллааҕы ыччаттар, ахсааннаах да буоллаллар, олоххо олус көхтөөх, үлэни-хамнаһы кыайар дьон этилэр, спорт, булт-алт умсулҕана диэн баран диэн баран түһүнэн кэбиһэллэрэ диэтилэр бэтэрээннэрбит.
“Үтүө киһи барахсан өспөт кэскиллээх,
Үс саха төрдө буолар үөһэттэн эттэриилээх.
Үтүө киһи барахсан үөлэһэ кыымнаах,
Үйэ да ааһан баран өрүү сырдыахтаах“
диэн саха норуодунай поэтэ Савва Тарасов хоһоонун тылынан бибилэтиэкэ үлэһитэ Сардаана Гермогенова арыйбыт көрсүһүүтүгэр Улахан Аантан төрүттээхтэр көһөн кэлбит саҕа буоллулар.
Нэһилиэк, оройуон үгүс киэн туттар дьоно И.С. Трофимовы ытыктаан ахта саныы кэлбитэкэргэнин, СӨ үтүөлээх бырааһын Галина Илларионовнаны, кини оҕолорун, сиэннэрин, чугас, аймах-билэ дьонун астыннарда. Буоларын курдук, СӨ култууратын үтүөлээх үлэһитэ Лидия Харитонова тойук туойда, бөртөлөр өрөгөй ырыаларын ыллаата. Улахан Аан «Аан Аартык”култуура дьиэтигэр дириэктэринэн үлэлии кэлбит Замир Горохов Лэгэнтэй ыллыыр “Хаҥалас»ырыатын ыллаан дуораһытта, виртуоз-хомусчут Спиридон Шишигин хомуһун тойугун бэлэхтээтэ.Улуус дьаһалтатын аатыттан саҥа анаммыт Сергей Гребнев солбуйааччыта Николай Степанов, Улуус мунньаҕын бэрэссэдээтэлэ Анатолий Антонов, СӨ доруобуйа харыстабылын миниистирин солбуйааччыта Дмитрий Сергин, РФ үтүөлээх тутааччыта, СҔ норуотун хаһаайыстыбатын үтүөлээх үлэһитэ, СӨ, Өлүөхүмэ, Хаҥалас, Алдан оройуоннарын бочуоттаах гражданина, “Саха сирин тимир суоллара» акционернай хампаанньа бастакы салайааччыта Дмитрий Трофимов, Иван Семенович кэргэнэ галига Илларионовна, оҕолоро, сиэннэрэ, чугас аймахтара, доҕотторо, бииргэ үлэлээн кэлбит кэллиэгэлэрэ Надежда Протодьяконова, Алексей Тарасов, Нина Мартынова, Валентина Скрябина, Людмила Иванова, Маргарита Пахомова, 2-Малдьаҕар баһылыгынан өр сылларгап үлэлээбит Александр Максимов, педагогтар Аркадий Пудов, Игнатий Иванов, суолу тутааччы Родион Кононов, И.С.Трофимов туҺунан кинигэ бэлэмнэһэн таһаарбыт Людмила Ефимова о.д.а. ахтыыларын оҥордулар, Галина Илларионовнаҕа, ыччаттарыгарбаҕа санааларын тириэтилэр. Тыл этээччилэр ууларыгар-хаардарыгар киирэн алтыһан ааспыт үөрүүлээх, холмолтолоох, үгүс көрүдьүөстээх түгэннэрин ахтан түөрт чаас устата барбыт тэрээһиммит биллибэккэ ааста. Кэлбит киһи бары санаатын этэн баран тэйэр дьон буолан биэрдилэр.Дьэ манна аҕыннылар Иван Семеновичтаах 1975 сыллаахха СГУ-ну бүтэрэн аан бастаан Булгунньахтаахха кэлбиттэрин, онтон Тааттаулууһун балыыһатыгар кылаабынай бырааһынан сэттэ сыл үлэлээбитин, салгыы дойдутугартуруорсан төннүбүтүн, элбэхтик алтыспыттарын, кэскиллээх олох туһугар бириэмэни аахсыбакка үлэлээбиттэрин. Элбэх да киһиэхэ ыарахан түгэннэригэр быраас быһыытынан көмөлөспүттэрэбит Иван Семенович, Галина Илларионовна. Саныылларыгар махтал!
