Бэс ыйын 25 күнүгэр Хаҥалас улууһун 1 Малдьаҕар нэһилиэгэр саха народнай суруйааччыта, киэн туттар биир дойдулаахпыт П.Н.Харитонов – Ойуку 85 сааһыгар анаммыт «Ойуку оһуордаах ыллыгынан» диэн өрөспүүбүлүкэтээҕи литературнай бэстибээл айар куттаах дьону, Ойуку айар үлэтин сэҥээрээччилэри, саха литературатын таптааччылары түмтэ. Тэрээһини П.Н.Харитонов – Ойуку аатынан Хаҥаластааҕы киин бибилэтиэкэ (дириэктэр Адамова И.И.) , 1 Малдьаҕар нэһилиэгин даһалтата (баһылык Рыгунов И.Е.), Булгунньахтаах сэлиэнньэтин модельнай бибилэтиэкэтэ (сэбиэдиссэй Дьяконова А.А.), “Өлүөнэ долгуннара” литературнай түмсүү (салайааччы Колесова Л.Н.) тэрийэн ыыттылар. Бэстибээлгэ барыта 76 киһи кыттыыны ылла, ол иһигэр Дьокуускай куораттан «Айар Кут» хоһоонньуттар уонна суруйааччылар эрэгийиэннээҕи Сойуустара, Нам улууһуттан «Отуу уота» түмсүү, Хаҥаластан «Айар кытыл», «Үнүгэс» түмсүү ыалдьыттаатылар.
Бэстибээл кыттыылаахтарын 1 Малдьаҕар нэһилиэгин аҕа баһылыга Рыгунов И.Е., Хаҥалас улууһун баһылыгын солбуйааччы Степанов Н.Н., Ойуку аатынан Хаҥаластааҕы киин бибилэтиэкэ дириэктэрэ Адамова И.И. эҕэрдэлээтилэр. П.Н.Харитоновка – Ойукуга сүгүрүйэ, махтана элбэх киһи тыл эттэ, бэлэх туттарда. Бэстибээл үөрүүлээх арыллыытыгар Сайсары Куо, Алена Слепцова – Мичийэ, Анна Торохова, Зоя Данилова – Кэкэрдэ ыллаан киэргэттилэр, Уруйдаана Харитонова салайааччылаах “Айыы кыһата” национальнай гимназия төрөппүттэрин уонна учууталларын кыл бөлөҕө сахалыы тыыннаах дорҕоонунан түһүлгэни киэргэттэ.
«Ойуку оһуордаах ыллыгынан» 3 түһүмэхтээх хоһоон күрэҕэр 19 киһи кытынна. Манна кыттааччылар Ойуку хоһоонун дорҕоонноохтук иэйиилээхтик ааҕан иһитиннэрдилэр, иккис түһүмэххэ гражданскай лирика тематыгар суруллубут эрдэ ыыппыт хоһоонноро сыаналанна уонна үһүс түһүмэххэ бэриллибит тирэх тылларынан тута хоһуйуу буолла.
Бастакы миэстэни Прасковья Байанаева (Нам), иккис миэстэни Юрчана Парникова (Нам), үһүс миэстэни Гаврил Адамов (Хаҥалас) ситистилэр. Кылаан чыпчаал аат Дьокуускай куораттан Лена Романова кыайыы өрөгөйүн биллэ уонна П.Харитонов – Ойуку дьиэ кэргэниттэн 20 тыһ.солк харчынан бириэмийэни тутта. Лена Ананьевна Романова Ф.И. Авдеева аатынан оҕо айымньытын дыбарыаһын учууталынан үлэлиир эбит. “Өлүөнэ кытылыгар диэн хоһооммун ааспыт күһүн бу кытылга тиксэн суруйбутум, уонна бу иэйиибин батыһан кэрэ кытылга тиксэн турабын. Хоһоонньут быһыытынан П.Харитонову – Ойукуну саҥа арыйдым уонна “Эн билбэккин” диэн хоһоонугар хараҕым хатанан ону аахтым, тыал уобараһынан тапталы хоһуйбута, тапталга сыһыарылыбыта олус ураты эбит», – диэн санаатын үллэһиннэ.
Күрэҕи Хаҥалас ааттаах-суоллаах суруйааччылара дьүүллээтилэр. Ол курдук, дьүүллүүр сүбэ бэрэссэдээтэлинэн биир дойдулаахпыт, прозаик, публицист, Россия суруйааччыларын, суруналыыстарын Сойууһун чилиэнэ, Хаҥалас улууһун бочуоттаах олохтооҕо Анна Егоровна Варламова – Айысхаана, чилиэннэринэн – СӨ суруйааччыларын, ырыа айааччыларын Сойууһун чилиэнэ, 2-с Дьөппөн нэһилиэгин Бочуоттаах олохтооҕо Галина Ивановна Иванова – Айтыына Уран, хоһоонньут, ырыа айааччы Сергей Исаевич Макаров уонна Улахан Аан бибилэтиэкэтин сэбиэдиссэйэ Албина Валерьевна Трифонова үлэлээтилэр.
Ити курдук, бу күн элбэх хоһоон ааҕылынна, айылынна, ырыа бөҕө ылланна, эҕэрдэ тыл этилиннэ. Бэстибээл саха төрүт үҥкүүтүнэн – оһуохайынан түмүктэннэ. Оһуохайы СӨ үтүөлээх оһуохай этээччитэ Ньургун Давыдов, «Өлүөнэ долгуннара» түмсүү чилиэнэ Анастасия Ющенко-Алгыстаана таһаардылар.
Тэрийээччилэр кэлбит ыалдьыттары сайаҕастык көрсөн, бэстибээл кыттыылаахтарын итии миининэн, сылаас соккуойунан, сибиэһэй балыгынан күндүлээтилэр. Ойукулуун киэһээҥи чэй олус иһирэхтик ааста. Бэстибээл кыттааччылара тапталлаах суруйааччыбыт Павел Николаевич Харитоновы – Ойукуну илэ көрсөн, кэпсэтэн, хаартыскаҕа түһэн, кини кэрэ айылҕалаах дойдутун сөҕө-махтайа көрөн, астынан, күүс-уох эбинэн, үөрэн-көтөн махтанан тарҕастылар. Онтон биһиги тэрийээччилэр, сүрүн спонсорбытыгар бу тэрээһини ыытарга кыах биэрбит, Аартык сынньалаҥ базатын хаһаайыныгар Степан Егорович Карповка уонна тэрээһини ыытарга күүс-көмө буолбут Павел Николаевич оҕолоругар махтанабыт.
Сардана Гермогенова
