Нөмүгү бибилэтиэкэтэ Хаҥаласка 11-с өрөспүүбүлүкэтээҕи модельнай бибилэтиэкэ аатын сүктэ

Бастакы ааҕар балаҕаннар 1921 сыллаахтан тэриллибиттэрэ, Нөмүгү нэһилиэгэр 1923 сыллаахха, ол аата быйыл төрүттэммитэ  102 сыла буолар. Урукку кэмнэргэ бибилэтиэкэлэр дьонтон кинигэ хомуйан, араас дьиэлэргэ үлэлээн, норуоту сырдыкка, үөрэххэ угуйар аналлаах бу саҥа үйэҕэ үүнэн-сайдан кэллилэр.

“Дьэ, тура -тура, күрэхтэһэ-күрэхтэһэ, бибилэтиэкэлэр тоҕо модельнай диэн ааты эккирэтэллэрий?” – диэн интэриэһиргииргит буолуо, күндү ааҕааччыларбыт. Модельнай диэн бибилэтиэкэлэргэ үрдүк бэлиэ аат (статус) буолар. Үчүгэйдэртэн үчүгэйдэрэ, элбэхтэн соҕотох чорбойон, ураты көстүүтүн бигэргэппит бибилэтиэкэ буолар. Хаҥалас улууһугар 2009 сыллаахха, бастакы модельнай бибилэтиэкэ 2-Дьөппөн бибилэтиэкэтэ буолбута. Немүгү бибилэтиэкэтэ 11-с өрөспүүбүлүкэтээҕи модельнай бибилэтиэкэ буолар. Ону таһынан өссө үрдүкү таһым – федеральнай модельнай бибилэтиэкэлэр буолаллар, биһиги улууспутугар улуустааҕы киин бибилэтиэкэ 2021 сылтан уонна улуустааҕы оҕо бибилэтиэкэтэ 2023 сылтан бу үрдүк ааты сүгэллэр.

Бу үрдүкү ааты ылар олох боростуой буолбатах бастатан туран бибилэтиэкэ чахчы чаҕылхайдык үлэлиирэ, нэһилиэккэ туһата, көхтөөх сыһыана, үлэтин таһыма барыта учуоттанар. Иккиһинэн, үлэлиир дьиэтин  ис-тас көрүнэ, дьиэ иэнигэр тиийэ, ирдэбилгэ эппиэтиирин барытын көрөллөр. Үсүһүнэн,  бу ирдэбили барытын түмэн, хомуйан, сөпкө сааһылаан, сурукка тиһэн, күрэхтэһиигэ саамай күүстээх заявка туттарыы буолар, ону оҥорор дьоннорбут биһиги үрдүк специалистарбыт методистарбыт Скрябина Екатерина Ермолаевна, Иннокентьева Татьяна Мэлсовна буолаллар.  

Модельнай бибилэтиэкэ статуһун ылар иһин ” Дьиэ кэргэн” национальнай бырайыак куонкуруһугар кыайан өрөспүүбүлүкэттэн 800 тыһынчаны, улуустан 200 тыһынчаны үбүлээһини ылары ситиһэн дьэ биһиги салайааччылар, закупщик уонна бухгалтерия үлэтэ саҕаланар. Саҥа миэбэль, оргтехника атыылаһааһына боростуой баҕайытык маҕаһыынтан тахсан атыылаһыы буолбатах, аукцион эбэтэр веб-торги уонна да атын  программаларга ирдэбилинэн бигэргэтэн игин баран биирдэ атыылаһабыт.  Хас хардыы барыта  улахан отчету, бэрэбиэркэни ирдиир. Культура, үп министерстволара,  прокуратура, бэйэбит дьаһалтабытыгар, салайааччыларбытыгар. Ону барытын улаханнык ыарырҕаппакка оҥорорбут эмиэ биһиги специалистарбыт күүстээхтэрин бигэргэтэр. Бу барыта кытаанах хамаанда үлэтин түмүгэ диэн этиэхпин баҕарабын уонна хас биирдии үлэһиппэр истиҥник махтанабын.

Хамаандабыт иһигэр аныгылыы эттэххэ волонтердар эмиэ бааллара. Бу волонтердар оскуола оҕолоро, студеннар боростуой биһиги бибилэтиэкэбит ааҕааччылара. Устудьуон оҕо холобур күрэхтэһиигэ кыттарбытыгар дизайн проект оҥорон биэрбитэ биһигини кыайыыга аҕалбыта мөккүөрэ суох. Оскуола оҕолоро сайын миэбэллэри таһан, кинигэ бөҕөнү сааһылаан көмө бөҕө оҥордулар. Ол кэннэ устудьуон доҕотторбут бибилэтиэкэни бэйэлэрэ харахтарынан хайдах көрөллөрүнэн, бэйэлэрин илиилэринэн кыратык ремонт оҥорон уонна онтукаларыгар тэттик видеоролик устан бэлэхтээтилэр. Дьэ бу оҕолорго бибилэтиэкэ аатыттан махтанабыт уонна кинилэргэ бары үчүгэйи, олохторугар, үөрэхтэригэр ситиһиини, уҕараабат үтүөнү, кытаанах доруобуйаны баҕарабыт.

Ыарахаттартан чаҕыйбакка үйэлэри уҥуордаан кэлбит Нөмүгүтээҕи филиал-бибилэтиэкэ, өрөспүүбүлүкэ, улуус сайдыытын кытта бииргэ хаамсан, саҥа тыын ылан,   дьонун-сэргэтин билиигэ-көрүүгэ, үрдүккэ угуйа,   сырдык кэскили түстүү турдун диэн баҕа санаабын этэбин.

Модельнай бибилэтиэкэ:

          Аныгы олох ирдэбилинэн,

          Саҥа кэм кэскилин түстүүр,

          Ааҕааччы аартыгын арыйар,

          Үөрэх чыпчаалын дабайар,

Куйаар ситимин баһылыыр,

          Өй-санаа мөккүөрүн сааһылыыр,

          Ситиһиилээх үлэни ситимниир,

          Киэҥ эйгэҕэ таһаарар,

          Сайдыы суолун арыйар.

Ираида Адамова

Прокрутить вверх