«Өлүөнэ долгуннара” айар түмсүү кыттыылаахтара өбүгэбит үгэһин утумнаан хас биирдии көрсүһүүбүтүн алгыс түһэрэн саҕалыыбыт. Бүгүн да ол үгэспитин умнубакка алгыс этэн бар дьоммутун арчылаатыбыт, үрдүк күүстэрбитигэр Аар Айыыларга, иччилэрбитигэр сүгүрүйэн, итэҕэйэн, махтанан бүгүн ыам ыйын 21 күнүгэр айах тутан көрдөстүбүт. Айар талааннаах дьоммут уйулҕалара ордук чараас буолан айылҕаҕа сылдьан, күүс-уох эбинэн, турукпутун бөҕөргөтөн, өссө да ыраас саҥа айымньылар үрүйэ уутунуу сүүрүгүрдүн диэн алгыс түһэрдибит.
Бу күн саҥа түмсүүгэ киирбит дьоммутун сүрэхтээтибит. «Өлүөнэ долгуннара” түмсүү андаҕарын эдэр дьон долгуйан туран эттилэр (андаҕар ис хоһоонун аллараа көр)
Дьэ ол кэннэ чэйдии – чэйдии Саха сирин бастакы кэрэ сибэккилэрин быыһыгар, ньургуһуннааах хонууга олорон “Сааскы иэйии” диэн хоһоон күрэҕэ үрдүк таһымҥа ааста. Бастакы миэстэни Сергей Макаров “Саас кэлиитэ” хоһоонунан ылыаҕын ылла. Иккис, үһүс миэстэни Петрова Т.М. – Мойуу Кыыһа, Сахаяна Лукина кэрэ нарын иэйиилэринэн ыллылар.
Бу күн өссө Ырыа күнэ буолан алыптаах ырыа ылланна, элбэх күрэхтэр ыытылыннылар. Инники үлэбитин былааннаатыбыт. Астык күн ааста диэн түмсүү дьоно астынан, сэргэхсийэн тарҕастылар.
Людмила Колесова, «Өлүөнэ долгуннара” түмсүү салайааччыта
