Кылаан киһи – Иван Кривогорницын
Саха сиригэр бокса төрүттэммитэ 70 сылынан.
От ыйын 23 күнүгэр П.Н.Харитонов-Ойуку аатынан улуустааҕы киин бибилэтиэкэҕэ Хаҥалас улууһун 1- Дьөппөн нэһилиэгэр аан бастаан оҕолорго тирии бэрчээкки кэтэрдээччи, айылҕаттан анаммыт уһулуччулаах бокса тренера, 19 сыл устата сүрэҕин баҕатынан үгүс көлүөнэ ыччаты бокска уһуйбут, Саха Республикатын үтүөлээх тренерэ Иван Романович Кривогорницын туһунан “Кылаан киһи” кинигэ сүрэхтэннэ.
Дьоһуннаах бэлиэ тэрээһини Иван Романович кэргэнэ РФ үлэ ветерана, Саха Өрөспүүбүлүкэтин муниципальнай сулууспатын ветерана, Хаҥалас улууһун финансовай сулууспатын ветерана, 1-Дьөппөн нэһилиэгин бочуоттаах олохтооҕо Галина Гаврильевна Кривогорницына көҕүлээн, иилээн-саҕалаан ыытта.
Тэрээһиҥҥэ Иван Романович үөлээннээхтэрэ, оскуолатааҕы кэмнэрин уонна устудьуоннааҕы сылларын доҕотторо, чугастык саныыр бары биир идэлээхтэрэ мустан истиҥник- иһирэхтик ахтан-санаан аастылар, спорт түһүлгэтигэр бэриниилээх үлэтин сырдаттылар.
Иван Романович 1977 сыллаахха СГУ тыа хаһаайыстыбатын факультетын бүтэрэн, зоотехнигынан 1-Дьөппөҥҥө ананан кэлбитэ. Ити сыл күһүнүттэн боксаҕа оскуола оҕолорун дьарыктаабытынан барбыта. Бастакы иитиллээччилэрэ 1978 сыллаахха Намҥа ыытыллыбыт өрөспүүбүлүкэ күрэҕэр ситиһиилээхтик кыттыбыттара. Олег Олесов Петя Захаров, Коля Платонов, Костя Захаров бары бочуоттаах үһүс миэстэни ылбыттара. Бу Иван Романович тренер быһыытынан үлэтин бастакы ситиһиитэ буолбута. 1979 сыллаахха Радик Прокопьев Иван Романович иитиллээччилэриттэн аан бастаан өрөспүүбүлүкэҕэ оҕолорго чемпион бочуоттаах аатын ылбыта. Максим Куприянов иккис, Коля Платонов үһүс буолбуттара. Бу мантан үктэл ылан Иван Романович иитиллээччилэрэ Саха сирин, Уһук Илин, Сибиир, Россия, Аан дойду араас таһымнаах турнирдарыгар далааһыннаахтык кыттан, кыайыы кынаттанан Дьөппөн сирин дуораччы аатырдыбыттара.
Иван Романович биир Аан дойду кылаастаах спорт маастарын, түөрт РФ спордун маастарын, 25 спорт маастарыгар боксаҕа кандидатын, түөрт Россия уонна ССРС чемпионун, алта Аан дойдуга бокса күрэҕин кыайыылааҕын уонна призерун иитэн таһаарбыта. Бу өр сыллаах боксаҕа анаабыт дьаныардаах үлэтин түмүгэ буолар.
Тыа сиригэр биир бастакынан бокс сайдыытыгар олоҕун анаабыт, үгүс сыллар тухары тус бэйэтинэн, хамнаһа суох, аҥардас дьулуурунан, боксаҕа тапталынан үүнэр ыччакка холобур буолбут кылаан киһи – Иван Романович Кривогорницын үтүө аата умнуллубатын.
Кинигэни хомуйан оҥорон бэчээккэ бэлэмнээбит – Т.М.Петрова-Мойуу Кыыһа. Кинигэ тахсыытыгар сүрүн сүбэһитинэн үлэлээбит РФ үөрэҕириитин туйгуна Н.Н.Платонов. Кинигэ 55 экземплярынан И.Р.Кривогорницын огдообото Галина Гаврильевна Кривогорницына үбүлээһининэн таҕыста.
“Кылаан киһи” кинигэ биир экземпляра улуустааҕы киин бибилэтиэкэҕэ бэлэх быһыытынан туттарылынна.
Александра Новоприезжая,
П.Н. Хапритонов-Ойуку аатынан улуустааҕы киин бибилэтиэкэ бибилэтиэкэрэ,
2026 с., от ыйа.
