Муус устар 30 күнүгэр Хаҥаластааҕы киин бибилэтиэкэҕэ элбэх көлүөнэ ыччаты билиигэ, үтүөҕэ сирдээбит Булгунньахтаах орто оскуолатын учууталлара Анна Ивановна Тимофеева уонна Вячеслав Семенович Лыткин туһунан “Жизнь, достойная подражания” диэн дьоһун кинигэ биһирэмэ буолан ааста. Кинигэни бэлэмнээн, хомуйан таһаарда кыраайы үөрэтээччи Наталья Ивановна Павлова. Наталья Ивановна бу номнуо алтыс кинигэтэ буолар. Кинигэҕэ 45 сыл устата математика учууталынан үлэлээбит Ленин, Үлэ Кыһыл Знамята, Бочуот Знага уордьаннар кавалердара Анна Ивановна Тимофеева уонна 16 сыл физика учууталынан, производствону үөрэтии маастарынан үлэлээбит Вячеслав Семенович Лыткин төрүттэрэ-уустара, олохторо, үлэлэрэ-хамнастара, үөрэппит оҕолорун ахтыылара, Лыткиннар-Тимофеевтар педагогическай династияларын туһунан суруллар. Элбэх архыып докумуоннара, историческай справкалар киирбиттэр. Бу кинигэни Наталья Ивановна үөрэппит учууталыгар, саҥаһыгар Анна Ивановнаҕа, таайыгар Вячеслав Семеновичка махтал бэлиэтигэр уонна кинилэр быйыл төрөөбүттэрэ 90 сылынан бэлэмнээн таһаарда.
Тэрээһини бибилэтиэкэ үлэһитэ Гермогенова Сардана Николаевна иилээн-саҕалаан ыытта. Биһирэмҥэ Ил Түмэн мунньаҕын депутата Мамедов Алиш Забид-оглы, Хаҥаластааҕы үөрэх управлениетын начальнига Шадрин Юрий Васильевич кыттыыны ыллылар. Анна Ивановна уонна Вячеслав Семенович сырдык ааттарыгар сүгүрүйэр чугас, аймах-билэ дьоно, бииргэ үлэлээбит, алтыспыт доҕотторо, үөрэппит оҕолоро мустаннар истиҥ иэйиилээх ахтылҕан күнүн сылаас эйгэтэ тэрилиннэ, истиҥ-иһирэх сэһэргэһии киэһэтэ буолла. Наталья Ивановна Павлова биир дьоһун үлэтэ үрдүктүк сыаналанна.
