Ыам ыйын 17 күнүгэр “Сарыал” культурнай киинигэр “Самыртай ” хочотун олохтоохторо “Кэм кэрдии кэрэкэ эргиирэ” хоһоон түһүлгэтигэр түмүстүбүт. Тэрээһиммит “Эҕэрдэ үҥкүүтүнэн” арылынна. Бастакы түһүмэх “А.Е.Кулаковскай – Өксөкүлээх Өлөксөй литературнай нэһилиэстибэтэ” Саха суругунан литературатын төрүттэммитэ 125 сылыгар ананна. Өксөкүлээх Өлөксөй Хачыкаакка суруйбут айымньылара “Өрүс бэлэхтэрэ”(1909), “Ойуун түүлэ” (1910), “Саха интеллигенциятыгар сурук” (1912) билигин даҕаны саха литературтын киэргэлэ буолаллар, өлбөт – сүппэт үйэлээхтэр. Өксөкүлээх Өлөксөй – бүгүҥҥү күммүт, сарсыҥҥы кэммит. Экраҥҥа “Икки чулуу дьон билсиһиилэрэ” кинигэ быыстапкатын ырытыы, “Доҕордоһуу сквера”, “Тииттээххэ тутуллубут стелла” историялара, “Кулаковскай акцияҕа” ааҕыллыбыт хоһооннор видеолара, Өксөкүлээх Өлөксөй туһунан презентация көрдөрүлүннүлэр. “Ойуун түүлэ” поэматтан быһа тардыыны “Сыһыы кустуга” айар түмсүү чилиэннэрэ уонна хоһоону таптааччылар аахтылар. “Күөрэгэйдээх Күөрдэмнэр” литературнай түмсүү Өксөкүлээх Өлөксөй биир сүдү айымньытын “Хомус” хоһоонун ааҕан иһитиннэрдилэр. Иккис түһүмэх Аҕа дойду Улуу сэриитигэр өрөгөйдөөх Кыайыы 80 сылыгар ананна. Хачыкаат орто оскуолатын үөрэнээччилэрэ Арчылаана Олесова, Дима Сулейманов хоһооннорун иһиттибит. “Күбэйэ” түмсүү ( салайааччы Ефимова Н.Н.) олохтоох автор Лиханова Н.М. – Чэмэлиинэ “Кэрэ дойдум Хачыкаат” хоһооно ырыа буолбутун ыллаатылар. “Кыайыы кынаттаах хоһоонноро” квест – оонньууну Күөрдэм нэһилиэгин “Ситим “КК директора Федорова С.С. тэрийэн ыытта. Үһүс түһүмэх “Ньургуһуннар кэрэлэрин” авторскай хоһоон түһүлгэтигэр уһун кыһын кэнниттэн кэрэни кэрэхсээн, маҥнайгы сибэккини уруйдуур бэйэтэ туспа иэйиилээх түгэн буолла. Айар куттаахтар Ньургуһун туһунан бэйэлэрэ суруйбут хоһооннорун аахтылар. “Дьүөгэлэр” ансамбль “Бииргэ буолуохха”, олохтоох автор А.Софроняева тылыгар уонна мелодиятыгар “Хачыкаат мин дойдум барахсан” ырыалары ыллаатылар. Айылҕаттан анаммыт айар кыаххыт ахсаабатын, суруйбут айымньыгыт үйэлэннин, айбыт айымньыгыт айхалланнын диэн алгыс тылынан хоһооммут түһүлгэтин түмүктээтибит. Тэрээһини библиотекарь Архипова С.В. иилээн – саҕалаан ыытта. Библиотекаҕа тахсан төгүрүк остуолга чэйдии – чэйдии санаа атастаһыыта, инники былааны торумнаатыбыт.
