Улуустааҕы бибилэтиэкэҕэ төрөөбүт тыл уонна сурук-бичик күнүн көрсө саха народнай поэта, РФ культуратын үтүөлээх үлэһитэ, Саха АССР искусствотын үтүөлээх деятэлэ, Саха комсомолун бириэмийэтин лауреата Иван Михайлович Гоголев – Кындыл төрөөбүтэ 95 сылыгар аналлаах «Иван Гоголев – Хаҥаласка” диэн ахтыы күнү ыыттыбыт. Тэрээһиҥҥэ Иван Гоголев кыргыттара: Саха академическай театрын cүрүн худуоһунньуга, СР искусствотын үтүөлээх деятелэ Лена Ивановна Гоголева, Иван Михайлович кыра кыыһа, суруйааччы, СӨ суруйааччыларын Сойууһун чилиэнэ, филологическай наука хандьыдаата, П.А. Ойуунускай аатынан Дьокуускайдааҕы государственнай литературнай түмэл үрдүкү научнай үлэһитэ, СӨ култууратын туйгуна Анна Ивановна Гоголева – Ленская, СР народнай артыыһа Зоя Петровна Багынанова, СР народнай суруйааччыта, Хаҥалас улууһун бочуоттаах олохтооҕо Павел Николаевич Харитонов – Ойукууонна Кындылы кытары алтыһан ааспыт дьон кэлэн ыалдьыттаатылар.
Мустубут дьоҥҥо Павел Николаевич Харитонов Иван Михайлович айар үлэтигэр саамай тахсыылаах кэмин иккис төрөөбүт сирин кэриэтэ буолбут Ханалас улууһун Покровскайыгар, улуу Өлүөнэ ытык сиригэр, былыргыта Хоруол тумуһугар олохсуйан олорон ааспыт олоҕун, айар үлэтин туһунан кэпсээтэ. Иван Гоголев кыргыттара аҕаларын, ийэлэрин туһунан истиҥник кэпсээтилэр, маны тэҥэ айар үлэлэрин туһунан сырдаттылар. Бибилэтиэкэҕэ саҥа кинигэлэрин бэлэхтээтилэр. Саха норуотун тапталлаах артыыһа Зоя Петровна Багынанова истиҥ кэпсээнин истэн, Иван Гоголев хоһоонноруттан аахпыта улахан сэҥээриини ылла.
Бу күн хоһоонньут, СР суруйааччыларын сойууһун чилиэнэ Л.Г.Драгунова-Күөрээйэ Сайда, Россия суруналыыстарын сойууһун чилиэнэ Е.Е.Скрябин, СР үөрэҕириитин үтүөлээх үлэһитэ, 1№-дээх Покровскайдааҕы орто оскуола дириэктэрэ С.С.Шишигин, СР культуратын туйгуна, 1 Малдьаҕар нэһилиэгин бочуоттаах олохтооҕо П.Е.Саввинов кэлэн Улуу киһини кытта алтыспыт кэмнэрин олус күндүтүк ахтан-санаан аастылар, эҕэрдэ ырыаларын толорон сэргэхситтилэр. Дьэ уонна Иван Гоголев тылларыгар, Аркадий Алексеев матыыбыгар «Аан дойду ыччатын сүрэҕэ” ырыаны бары күргүөмүнэн толоруунан ахтыы күммүтүн түмүктээтибит.
