«Норуот күүһэ өйүгэр – өйүн күүһэ тылыгар» күрэх
Олунньу 13 күнүгэр төрөөбүт сахабыт тылын сайыннарыыга, чинчийиигэ олоҕун анаабыт, саха алфавитын төрүттээбит, бастакы лингвист Семен Андреевич Новгородов төрөөбүт күнэ, ону сэргэ төрөөбүт тыл, сурук-бичик күнүнэн бэлиэтэнэр. Онон салайтаран биһиги нэһилиэкпитигэр, Ийэ тыл, сурук-бичик күнүгэр аналлаах тэрээһин сэргэхтик буолан ааста.
Тэрээһин сахалыы сиэринэн алгыһынан саҕаланна. Сиэри-туому алгысчыт, СӨ култууратын туйгуна Андриан Семенович Белалюбскай толордо. Тэрээһиҥҥэ оскуола үөрэнээччилэрэ, эдэр ыччат, аҕам саастаах дьон кытыннылар. «Барҕарыы” КК дириэктэрэ Федора Ивановна Фомина бу бэлиэ күнүнэн олохтоохтору эҕэрдэлээтэ, төрөөбүт тылга болҕомтолоохтук сыһыаннаһарга ыҥырда Үөрүүлээх тэрээһини «Сардаҥа» фольклорнай түмсүү норуот ырыаларын толорон, дьон сэҥээриитин ыллылар.
Модельнай библиотека сэбиэдиссэйэ Сардаана Данилова «Норуот күүһэ өйүгэр – өйүн күүһэ тылыгар» хамаандаларынан квиз оонньууну ыытта. Оонньу сүрүн сыала: төрөөбүт дойдуга, ийэ тылга тапталы, ытыктабылы иитии, иҥэрии буолар.
Күрэххэ түөрт хамаанда кытынна. П.И. Шадрин аатынан Өктөм оскуолата икки хамаанданы туруорда, Өктөмнөөҕү АГАТУ хамаандата, нэһилиэк общественниктарын хамаандата. Күрэх түөрт түһүмэҕмнэн барда саха литературатын төһө билэҕин, таабырынна таайсыаҕын, тыл оонньуута (буукубалартан тыл таһаарыы), суруйааччылары таай. Көрөөччүлэр күрэххэ оскуола оҕолоро учууталларын уонна улахан дьону кытта бииргэ күрэхтэспиттэрин сэҥээрдилэр. Хамаандалар бары түһүмэхтэргэ көхтөөхтүк кытыннылар, элбэх саҥаны биллилэр. Күрэх түмүгүнэн:
1 миэстэ «Кэрэ» хамаанда
2 миэстэ “Эрэл” хамаанда
3 миэстэ “Хотой” хамаанда буллулар.
Кыайыылаахтар дипломнарынан, бэлиэ суруктарынан бэлиэтэннилэр.
Хайа да омук төрөөбүт тылын билэр, таптыыр сыаналыыр кэнчээри ыччаттаах буоллаҕына, тыыннаах буолар, салгыы сайдар. Төрөөбүт тыл, сурук-бичик күнэ үтүө үгэскэ кубулуйан, сыллата бэлиэтэнэн, тэнийэн, сайдан истин!
