Бэс ыйын 21 күнүгэр Орто Дойду маанылаах сиригэр Эркээни ыһыаҕа буолан ааста. Хаҥаластааҕы киин бибилэтиэкэ уонна Г.В.Ксенофонтов аатынан кыраайы үөрэтэр түмэл Ойуку түһүлгэтин тэрийдибит. Павел Николаевич үбүлүөйдээх сааһын көрсө «Айымньыга айан” диэн “Хоболоох суол” романынан түрдьэ хартыыналар быыстапкатын арыыллыыта буолла. Бу үлэҕэ Хаҥаластааҕы киин бибилэтиэкэ, “Өлүөнэ долгуннара” литературнай түмсүү кыттыыны ыллылар. Суруйааччы биир дойдулаахтара Булгунньахтаахтан кулууп, бибилэтиэкэ үлэһиттэрэ уонна уруһуйдуур түмсүү дьоно бырайыакка кыттыһан өйөөтүлэр. Олунньу ыйтан айымньыны ааҕан саҕалаан, киистэҕэ түһэрэн “Хоболоох суол” 4 кинигэтиттэн тыыннанан дьикти кэрэ түрдьэ хартыыналар айыллан таҕыстылар. Бырайыак автора – Хаҥаластааҕы киин бибилэтиэкэ бибилэтиэкэрэ, СР культуратын туйгуна Колесова Людмила Николаевна. Бу күн Павел Николаевиһы кини доҕотторо Саха народнай суруйааччыта Семен Андреевич Попов – Тумат, идэтийбит уус-уран тылбаасчыт Альбина Андриановна Борисова, прозаик, тылбаасчыт, “Чолбон” сурунаал бас эрэдээктэрин солбуйааччы Данил Николаевич Макеев ыалдьыттаатылар. Түһүлгэҕэ толору “Сказание о земле Хангаласской” быыстапка, ону таһынан Ойуку илиитинэн оҥорбут уран оҥоһуктара, уруһуйдара турдулар. Күн устата быыстапканы элбэх киһи сөҕө-махтайа көрдө-иһиттэ.
