Бүгүн улуустааҕы бибилэтиэкэҕэ бэлиэ тэрээһин буолла. Митрофан Ефремов уонча сыл сыралаһан туран Хаҥалас 24 кулубатын туһунан дьоҕус кинигэни бэчээттэтэн биир дойдулаахтарыгар уунна.
Кинигэни билиһиннэриигэ ааптар элбэх докумуону хасыһан, үөрэтэн, 1767 сылтан 1917 сылга диэри үлэлээбит ытыктанар салайааччыларбытын киэҥ араҥаҕа таһаарда. Манна сүбэһит-амаһыт, көмөлөһөөччү быһыытынан кыраайы үөрэтээччи Капиталина Скрябина буолбутугар, үбүлээһиҥҥэ улууспут дьаһалтата көмөлөспүтүгэр махтанна.
Кинигэни билиһиннэриигэ улууспут баһылыга Олег Иринеев, СӨ история, култуура пааматынньыктарыгар кэмитиэт салайааччыта Николай Макаров, Улуус Мунньаҕыттан Борис Протодьяконов, 2-с Малдьаҕар оскуолатыттан Парасковия Максимова, кыраайы үөрэтээччилэр Николай Ильин, Прокопий Ноговицын о.д.а.тыл эттилэр, кинигэ тахсыбытынан эҕэрдэлээтилэр, кэмигэр, биһиэхэ көмөҕө кэлбитинэн махтаннылар. Сиһилии “Хаҥалас” хаһыаттан билсээриҥ.
Людмила Аммосова.
