Саха Өрөспүүбүлүкэтин Ил Дархана Айсен Николаев 2023 сыл балаҕан ыйын 7 күнүгэр Арассыыйа норуоттарын култуураларын үйэлээх баайын эбийиэгин – саха төрүт үҥкүүтүн оһуохайы – үйэтитэр уонна тарҕатар соруктаах ыам ыйын 25 күнүгэр Оһуохай күнүн олохтуур туһунан ыйаахха илии баттаабыта.
Онон быйыл өрөспүүбүлүкэҕэ Оһуохай күнэ аан бастакытын бэлиэтэннэ.
Оһуохай – сахалар оччоттон баччаҕа диэри илдьэ кэлбит төрүт үгэстэрэ, үҥкүүлэрэ. Өктөм нэһилиэгин олохтоохторо бу күнтэн туора турбакка үөрэн-көтөн туран Эркээни хочотун маанылаах сиригэр Орто Дойду ньургуһуннаах кырдалыгар тоҕуоруһа муһунна.
Нэһилиэкпит дьоно-сэргэтэ сахалыы таҥастаах кэлэннэр оһуохайдаан дьиэрэттилэр, эһиэхэйдээн эйээрдилэр. Бу үөрүүлээх күнү саха сиэринэн алгыһынан астыбыт. Өктөм нэһилиэгин бибилэтиэкэтин үлэһиттэрэ, мустубут дьоҥҥо Николай Егорович Петров уонна Василиса Егоровна Романова оһуохайга анаммыт үлэлэрин сиһилии билиһиннэрдилэр.
Тэрээһинҥэ тоҕуоруһа мустубут дьон илии илиилэриттэн ылсаннар, тоҥолохтон тутуһаннар оһуохайы таһаарар киһини батыһа ыллаан, күн эргииринэн төгүрүччү хааманнар, үҥкүүлээн тэйэннэр санаалыын чэпчээтилэр, эттиин-сиинниин чэбдигирдилэр. Оьуохайы таһаардылар Светлана Харлампьева, Светлана Ксенофонтова, Раиса Сысоева, Дария Захарова уо.д.а.. Бары кыттааччылар айылҕаттан күүс ылан, үөрэн-көтөн сынньанан тарҕастылар.
Хаҥалас улууһун эдэр ыччата өбүгэлэрин үтүө үгэстэрин убаастаан, киэҥ туттан туран оһуохайы тиһигин быспакка өрө тутуохтара, сайыннарыахтара диэн эрэнэбит.
