Аан Дойдуга Дьиэ кэргэн күнүгэр анаан, Арчы дьиэтигэр “Эркин курдук эрэллээх дьоммут” диэн кинигэ сүрэхтэниитэ буолан ааста. Кинигэ ааптара педагогическай үлэ бэтэрээнэ “Учууталлар учууталлара”, Хаҥалас улууһун Булгунньахтаах сэлиэнньэтин бочуоттаах олохтооҕо, 86 сааһыгар сылдьар, 8 көлүөнэҕэ тиийэ тэнитэн төрүччүлэрин ырытан оҥорбут, Вера Георгиевна Орестова- Спиридонова күндү дьонугар сырдык кэриэстэригэр анаан кинигэ суруйбут.
Бу кинигэҕэ киирбиттэр Григорьевтар, Орестовтар, Павловтар, Варфоломеевтар, Слепцовтар бары хаан- уруу аймахтар. Вера Георгиевна хас да сыл архыыптан хасыһан, сыралаах үлэтин кинигэ оҥорон, дьонугар- сэргэтигэр сүдү бэлэх оҥордо. Бу киэҥ аймах саха мааны ыала буолан, оҕо-уруу тэнитэн. үлэ бөҕөтүн үлэлээн, үлэ үөһүгэр үрдүк кирбиилэри ситиһэн, кыайыылаах – хотуулаах үлэҺит буолан, олорон ааспыт ытык олохторун, кэрдиис кэмнэрин кэпсиир чахчылар, бииргэ алтыһан ааспыт дьоннорун, оҕолорун, сиэннэрин ахтыылара, хаартыскалара киирдилэр.
Тэрээһин арыллыытыгар саха сиэринэн бар дьоммутугар сүргэни көтөҕөр, санааны күүһүрдэр, тускуга туһаайар Алгыс сиэрин- туомун Татьяна Слепцова- Тускууна оҥордо. Кинигэ сүрэхтэниитигэр эҕэрдэ тылы эттилэр: 1 Малдьаҕар нэһилиэгин баһылыга Айталина Ивановна Васильева, С.П.Ефремов аатынан Булгунньахтаах орто оскуолатын директора Александр Петрович Тимофеев, бу тэрээһини көҕүлээбит бэтэрээннэр түмсүүлэрин салайааччыта Александра Алексеевна Павлова, нэһилиэк дьонун үйэтитэргэ күүскэ үлэлэспит үлэ бэтэрээнэ Раиса Алексеевна Архипова уонна аймах- билэ дьонноро Орестовтар, Варфоломеевтар. Ону таһынан музыкальнай зҕэрдэлэринэн тэрээһини киэргэттилэр: алгыс тойугун туойан иһитиннэрдэ «Дьиэрэй ырыа» култуура киинин уус- уран салайааччыта Ирина Давыдова, байаанынан доҕуһуоллаан ырыа ыллаата СӨ култууратын туйгуна Петр Саввинов, “Дьиэрэй ырыа” култуура киинин кэскиллээх ырыаһыта Ньургун Давыдов.
Бу курдук нэһилиэкпит сайдыытыгар олук уурбут дьоммут ааттарын үйэтитэн, кэлэр көлүөнэҕэ ыччаттарбытыгар тириэрдэр биһиги ытык иэспит. Тэрээһин түмүгэр өйдөбүнньүк уопсай хаартыскаҕа түһүү буолла. Кэлбит дьон астынан, махтанан, кинигэ бэлэх тутуурдаах тарҕастылар.
Бу тэрээһини иилээн- саҕалаан ыытта олохтоох библиотека салайааччыта Анисия Дьяконова.
