Муус устар 4 күнүгэр Николаев архив – библиотека аактабай саалатыгар “Тыа сирэ – сайдыы киинэ” диэн Хаҥалас улууһугар тыа хаһаайыстыбатын сайдыытын, тэрээһиннээх хаһаайыстыбалар үлэлэрин-хамнастарын кэпсиир дьоһун кинигэ таҕыста. Кинигэ тыа хаһаайыстыбатын фермердэрин уонна кооперативтарын тумэн салайар АККОР тэрилтэ 35 сыллаах үбүлүөйүгэр уонна республика бастакы Президенэ Михаил Ефимович Николаев сырдык аатыгар ананан таҕыста.
Кинигэни Саха Республикатын Агропромышленнай комплекс бочуоттаах үлэһитэ, “Гражданскай килбиэн” бэлиэ хаһаайына, үлэ ветерана Николай Филиппович Трофимов түмэн сааһылаан оҥордо. Николай Филиппович бу 12-с кинигэтин таһааттарда. Ол иһигэр 8 кинигэтин Хаҥалас улууһун туруу үлэһит дьонун, Аҕа дойду Улуу сэриитин кыттыылаахтарын туһунан суруйбута. Кинигэ тахсарыгар сыратын-сылбатын ууран, сүүрэн-көтөн бэлэмнээн сүҥкэн кылааттаах киһинэн улуус фермердэрин уонна кооперативтарын ассоцияциятын бэрэссэдээтэлэ, СР тыатын хаһаайыстыбатын туйгуна Розалия Романовна Петрова буолар. Үөрүүлээҕэ диэн, кинигэ тахсыытын улуус иһигэр үлэлиир бааһынай хаһаайыстыбалар бэйэлэрэ үбүлээтилэр. 17 хаһаайыстыба санааларын түмэн, үбүнэн-харчынан көмөлөһөн кинигэ таҕыста.
Кинигэ биһирэмэр ыраахтан-чугастан олус элбэх киһи түмсэн, улуустар фермердэрин уонна кооперативтарын салайааччылара, бааһынай хаһаайыстыба баһылыктара ыалдьыттаатылар. Хаҥалас улууһун баһылыга О.В.Иринеев эҕэрдэ тылыттан саҕаланна. Элбэх наҕараада туттарылынна. Анна Семеновна Данилова аатынан Өктөмнөөҕү “Барҕарыы” культура киинин үлэһиттэрэ ырыанан киэргэттилэр. Кинигэ биһирэмэ үрдүк таһымнаахтык, өрө көтөҕүллүүлээхтик буолан ааста.
