Бэҕэһээ Хаҥаластааҕы киин бибилэтиэкэ саалатыгар бэрт истиҥ, иһирэх кэпсэтиилэрдээх кинигэ сүрэхтэниитэ буолла. Покровскай куорат олохтооҕо, Ис дьыала органнарын бочуоттаах бэтэрээнэ, “Хаҥалас” хаһыат общественнай корреспондена Анатолий Петрович Харлампьев – Харалаан 80 сааһын туолар үбүлүөйдээх сылын кинигэ кэһиилээх көрүстэ. “Тыл уонна итэҕэл” диэн ааттаах бэһис кинигэтин таһаарбыт үөрүүтүн чугас дьонун кытта үллэһиннэ. Киин бибилэтиэкэ типографиятыгар бэчээттэнэн тахсыбыт кинигэни бибилэтикэ үлэһиттэрэ Колесова Людмила Николаевна, Курчатова Саргылана Гаврильевна тутан-хабан, эрэдээксийэлээн, таҥан таһаардылар.
Кинигэ сүрэхтэниитигэр кэлбит ыалдьыттар баҕа санааларын эттилэр, сэмэй бэлэхтэрин туттардылар. Бу күн Хачыкаат нэһилиэгин баһылыга Ирина Викторовна Оболкина Анатолий Петровичка “Хачыкаат нэһилиэгин бочуоттаах олохтооҕо” диэн түөскэ анньыллар бэлиэтин дохсун ытыс тыаһын ортотугар туттарда. Уруккуну-хойуккуну олус истиҥник ахта-санаан ааһан, астына-дуоһуйа кэпсэтэн, үөрэн-көтөн тарҕастылар.
