«Библионочь» Бүтүн Россиятааҕы сырдатар акция чэрчитинэн «Ааҕабын, өйдүүбүн, билэбин» остуол оонньуутугар Покровскай куорат үлэһит кэллэктииптэрэ уонна түмсүүлэрэ күөн-көрүстүлэр.
Төрөөбүт тылы билэргэ, тыл саппааһын байытарга туһуламмыт саҥа остуол оонньуутун дьиэ-кэргэнинэн, хамаанданан түмсэн оонньуурга сүрдээх табыгастаах. Сүүс биэс карточкалаах остуол оонньуута күн сирин көрөрүгэр тус толкуйун, идэлээх сатабылын ууран үлэлээбит улуустааҕы киин бибилэтиэкэ үлэһитэ Сардана Гермогенова буолар. Оонньуу дизайн макыатын, ол эбэтэр тас көстүүтүн, харах көрөн кэрэхсиир оһуордаах ойуунан киэргэтэн оҥордо улуустааҕы киин бибилэтиэкэ үлэһитэ Саргылана Курчатова.
Бу оонньуу «Хаҥалас улууһа» муниципальнай оройуон баһылыга Ийэ тылы сайыннарыыга анаабыт Гранын үбүгэр-харчытыгар Новосибирскай куоракка 200 ахсаанынан бэчээттэнэн таҕыста.
Саха тылын баайын, төрөөбүт тыл сүмэтин, өй-мэйии үлэтин тургутуһар түһүлгэҕэ Покровскайдааҕы 3№-дээх орто оскуола хамаандата (сал. инклюзивнай үөрэхтээһиҥҥэ дириэктэри солбуйааччы Владимирова А.В.), Хаҥалас улууһун нэһилиэнньэтин социальнай харалтаҕа уонна үлэҕэ салалтатын хамаандата (сал. Иванова Л.И.), Хаҥалас улууһун литературнай түмсүүтэ «Өлүөнэ долгуннара» (сал.Колесова Л.Н.), Олох-дьаһах коммунальнай хаһаайыстыбатын Хаҥаластааҕы филиалын хамаандата (сал. профком бэрэссэдээтэлэ Заровняев С.В.), «Дьулуур» ветераннар ансаамбылларын хамаандата (сал.үлэ ветерана Маркова Л.Н.) кытыннылар.
Хамаандалар харчынан усунуостарын уопсай сүбэнэн сүрүн бириис быһыытынан туруордулар.
Илин-кэлин түсүһүүлээх алта түһүмэхтээх тыҥааһыннаах оонньуу бэрт сэргэхтик, көхтөөхтүк ааста.
Оонньуу түмүгүнэн муҥутуур кыайыылаах «Өлүөнэ долгуннара» хамаанда ааттанна уонна харчынан сүрүн бирииһи тутта.
Кыттыыны ылбыт хамаандалар төрөөбүт тылы билэргэ, сайыннарарга тус дьулуурдарын, баҕаларын биһирээтибит уонна тэрийээччилэр ааттарыттан махталбытын биллэрэбит. Сиэпкэ укта сылдьан оонньонор, «Ааҕабын, өйдүүбүн, билэбин» (сахалыы алиас) остуол оонньуута үгүс көрдөөх көрсүһүүлэри, көхтөөх түмсүүлэри сэргэхситиэ, саха дьонун-сэргэтин үөрдүө-көтүтүө диэн бигэ эрэллээхпит.
