Алтынньы 2 күнүгэр Булгунньахтаах библиотекатыгар, Аҕам саастаах ааҕааччыларыгар анаан “Көмүс саас” диэн тэрээһин ыытылынна. Манна библиотека сонунун иһиттилэр уонна литературнай түмсүү “Айар кытыл” талааннаах хоһоонньута Александр Уваров- Сата Уола “Олоҕум суола” диэн бэһис саҥа кинигэтин сүрэхтэниитэ буолла. Эҕэрдэ тыллары эттилэр: 1 Малдьаҕар нэһилиэгин Аҕа баһылыгын солбуйааччыта Дмитрий Семенович Лаврентьев, литературнай түмсүү аҕам саастааҕа Раиса Алексеевна Архипова, Уваровтар дьиэ кэргэттэриттэн Надежда Михайловна Михайлова, айар куттаах Николай Николаевич Егоров, библиотека салайааччыта Анисия Алексеевна Дьяконова. Ону таһынан ааҕааччылар Сата Уолун хоһооннорун ааҕан иһитиннэрдилэр. Түмүгэр Александр Михайлович библиотекаҕа биэс «обязательнай экземпляр» кинигэтин бэлэх уунна. Кэлбит дьон үөрүүнэн саҥа кинигэлэри ааптар илии баттааһыннаах атыыластылар. Маны таһынан Улуу Кыайыы 80- сылыгар анаан историческай лотуо, остуол тула оонньоотулар. Бастакы лотуо хонуутун толорбут үс киһи бириискэ тигистилэр. Бүтэһигэр бары өйдөбүнньүк хаартыскаҕа түһэн тарҕастылар. Кэлбит дьон астына сынньанан, сэргэхсийэн, элбэх сонуну истэн, махтанан бардылар. Олохтоох библиотека аатыттан тэрээһиҥҥэ кыттыбыт аҕам саастаах ааҕааччыларбытыгар махталбытын тириэрдэбит. Бу курдук үөрэ- көтө, олохтон дуоһуйа, астына сылдьаргытыгар. Кырдьыы кыттыспатын, ыарыы ыалласпатын, чугас дьоҥҥут тапталларыгар бигэнэн уһун үйэлэнин диэн алгыс тыллары анаатахпыт буоллун.
Олохтоох библиотека салайааччыта Анисия Дьяконова.
