Муус устар умсулҕаннаах ыйыгар Хаҥаластааҕы киин бибилэтиэкэ конференц саалатыгар олус истиҥ көрсүһүү буолла. «Көмүөл” кинигэ кыһатын дириэктэрэ, СӨ үтүөлээх суруналыыһа, суруйааччы, “2022-2024 сс. Москватааҕы литературнай биеннале-бириэмийэ” аччыгый прозаҕа Василий Белов аат. бириэмийэ хаһаайына Борис Иванович Павлов – Кэм ыалдьыттаата, «Атах балай” диэн саҥа тахсыбыт кинигэтин билиһиннэрдэ.
Көрсүһүүгэ үгүс дьон кэлэннэр эҕэрдэ тыллары эттилэр. Саха народнай суруйааччыта Павел Николаевич Харитонов – Ойуку, суруналыыстар Людмила Денисовна Аммосова, Ольга Валентиновна Гермогенова, кыраайы үөрэтээччи Прокопий Романович Ноговицын, «Өлүөнэ долгуннара” литературнай кулууп, СР суруйааччыларын Сойууһун чилиэннэрэ Валерий Софронович Данилов – Эркин, Татьяна Михайловна Петрова – Мойуу кыыһа, ветеран суруналыыс Раиса Николаевна Парникова, “Хаҥалас” хаһыат общественнай корреспондена Гаврил Гаврильевич Моисеев эҕэрдэлээтилэр, санааларын үллэһиннилэр. Покровскайдааҕы 1-дээх оскуола саха тылын, литературатын учуутала Людмила Моисеевна Горохова саха литературатын сэргиир, интэриэһиргиир уонна суруйар талааннаах оҕолору көрсүһүүгэ кытыннарда. Үөрэнээччилэр олус сэргээн иһиттилэр, өссө суруйааччыттан автографтаах кинигэ тутан үөрдүлэр-көттүлэр.
Борис Иванович ыалдьыттарыгар «Атах балай” диэн саҥа кинигэтин бэлэх уунна. Кэлбит дьон истиҥ көрсүһүүттэн астынан, өссө саҥа кинигэ бэлэх тутан икки бүк үөрүүлээх тарҕастылар.
