Открывая книгу, открываешь мир!

  • Пн-Сб: с 10:00 до 19:00
  • Перерыв с 13:00 до 14:00
  • Выходной: воскресенье

МБУК «ХАНГАЛАССКАЯ МЦБС»

Муниципальное бюджетное учреждение культуры
«Хангаласская межпоселенческая централизованная библиотечная система»
муниципального района «Хангаласский улус» РС (Якутия)

ПОЭЗИЯ КҮНЭ

Тоһуттар томороон тымныылар ааһаннар, сандал сааспыт тиийэн кэллэ. Кулун тутар 21 күнүгэр Аан дойду үрдүнэн поэзия күнэ.
Хомо5ой тыллаах хоһоонньут, 9 кинигэ ааптара, Саха сирин Суруйааччыларын Сойууһун чилиэнэ, Хоточчу олохтоо5о Васильев Илья Афанасьевич- Ылдьаа Хоточчу дьыл кэмиттэн- сааһы хоһоонноругар хоһуйбутун аа5ың.

Ырааһы саныыбын
Сааскыны салайбыт сандаархай бу күннэр,
Сыа хаарга сарыалы оонньото күллэрэн,
Дьиктитик да5аны абылыыр күүстээхтэр,
Дэгэрэң үңкүүлээн дууһаны ириэрэн.

Чараң тыа барахсан кыһынын атааран,
Сыгынньах лабааттан хаардарын тэбэнэр,
Ча5ыл күн уотугар туос өңө кылбааран,
Сыламныы манньыйан саас кээлтин билинэр.

Сатыылыыр чуумпуга кыттыһа ньимийэн,
Саныыбын ыраа5ы, сыһыарбат ырааһы.
Күн ыллыыр ырыатын сүрэхпэр иңэрэн,
Күүтэбин долгуйа чээл күөххэ хаамаары.

Таптыыбын
Мин таптыыбын сааһы,
Күнүм оонньуур көрүн.
Миигин баттыыр сааһы
Умуннарар кө5үн.

Мин таптыыбын хаары,
Күлүм аллар ньуурун.
Хаартан быгар мааны,
Хорсун чэчик уо5ун.

Мин таптыыбын салгын,
Сайа салыыр сытын.
Хатың чараң тыыллан,
Хаарын ыһар кыымын.

Мин таптыыбын дойдум
Сааһы көрсөр күөнүн.
Ирбит истиң кутум
Иэйэр-куойар күнүн.

Кулун тутар
Кубул5аттаах кулун тутар
Куйуһута да тыынар,
Курус санаа ыраах куотар,
Куойар кутум кууһа тутар.

Күлэ-үөрэ күммүт тыгар,
Көмүрүө5э күлүм ыһар.
Күлүк күөнэ көстө сүтэр,
Күрүс күргүөм кө5ө күүрэр.

Сааскы тыыннаах чараас тыаллар
Сайа охсон ааһаллар,
Саһыл хааннаах сарыал уоттар
Са5ахтарга сандаараллар.

Кубул5аттаах кулун тутар
Кулуһуна умайар,
Курус кутум сылаанньыйар,
Куйуһута иэйии кутар.

Сааскыга
Сааскылыы салбараң киэһэ5э
Санааны саймаарда тыынабын,
Бу кууһар уоскулаң чуумпуга
Бу кэлбит сааһы мин туойабын.

Тыргылла субуллар уһун суол,
Нууралы сырсыһа тыллыбыт.
Туманы бүрүммүт тунаар дуол,
Намыйа сылаар5аан сынньаммыт.

Сулус уот барбахтык кыламныыр,
Халлааңңа иһиллиир уу чуумпу.
Сүрэхтэн устабын уустугу,
Хаарыан хаар атахпар сыстаңныыр.

Ааспыт ааспатах амтана,
Айаным арахпат аргыһа.
Ибирдии илгийэр итиинэн,
Иэйиибин ситэри күөдьүтэн.

Ол сырдык сүппэтэх сыдьаайы,
Отоннуу толору ытыһан,
Ахтыл5ан бу уунна утары,
Айаарбыт кэмнэргэ кыттыһан.

***

Чэмэлийбит күлүм күн
Ча5ылыйа да тыкта,
Түннүк килиэ тааһыгар
Тырым уота саалынна.

Дьо5ус чороон ньургуһуннар
Дьоһун ыһыах ыстылар,
Түһүлгэ бэрдин тарданнар
Төбүрүөннээн турдулар.

Сандал сааһым куолакала
Сатарыйа ыллаата,
Дьикти тойук кутуллан
Дуораһыйа тар5анна.

Күн көрдө

Хаар былыт дьай5аран
Халлааммыт халынна,
Күндээр күн са5ахтан
Күлүмнүү күөрэйдэ.

Сааскы күн сарыалын
Саһарар суһума
Сарпах уот кыымынан
Сандаара сыдьаайда.

Күн уотун күлүмэр
Көмүс хаар ча5ыла
Дьирим күөх уотунан
Дьэргэйэ оонньоото.

Туус маңан өңүнэн
Туртаһар туллуктар
Тунал хаар үрдүнэн
Тирилии көттүлэр.

***
Дьыл кэмэ солбуһар түгэнэ
Дьыбардаах кыһыны үтэйдэ,
Сандал саас кэлбитин бэлиэтэ
Сылам күн кый үөһээ күөрэйдэ.

Тумаңңа тууйуллар тулабыт
Тыын ылан тырымныы күндээрдэ,
Тыһыргыы тоһуттар тымныыбыт
Тыастарын хомунан күрэннэ.

Кубул5ат майгылаах ый кэлэн
Куһуурар тыаллары түһэрдэ,
Кыһыңңы чараңы илбийэн
Кырыалаах хаардарын тэбээтэ.

Сааскыны көрсөммүн үөрэбин
Сыл аайы сылайа кэтэһэн,
Хаһыс хаар ууллуо5ун аа5абын
Хаардыйбыт төбөбүн хоңкутан.

Сурукка тистэ Хоточчу олохтоох библиотека үлэһитэ Лира Яндреева.

Добавить комментарий

Ваш адрес email не будет опубликован. Обязательные поля помечены *